॥ जय जय रघुवीर समर्थ ॥ ॥श्रीमंत दासबोध ॥
दशक पहिला समास आठवा
Samarth emphasizes the importance of spiritual gatherings in this context. A meeting is a gathering of people at a prearranged time and place. In this Samas, a group of devotees who are spiritually chanting and listening, who are loyal to God, disciplined and contemplative, are described.Samarth says that I do all spiritual gatherings and salvation is facilitated by meetings. God stands by us in those meetings with love. Samarth says, I am not found in paradise, not found in the hearts of the righteous, but in the places where my devotees sing, Narada, I stand. Samarth says that there is a roar of chanting and a roar of praise to God.
समर्थानी या समासात अध्यात्मिक सभांचे महत्व सांगितले आहे. पूर्वनियोजित वेळी आणि विशिष्ठ स्थळी कार्यसिद्धीसाठी जमलेला जनसमूह म्हणजे सभा होय. या समासात आध्यात्मिक कीर्तन व श्रवण करणार्‍या भगवंतावर निष्ठा असणार्‍या, शिस्तबद्ध व चिंतनशील, श्रद्धावान जनसमुहाचे वर्णन केले आहे.समर्थ सांगतात मी सर्व आध्यत्मिक सभांना करतो आणि आशा सभेने मुक्ती सुलभ होते. त्या सभांना ईश्वर आपण होऊन प्रेमाने उभा राहतो. समर्थ सांगतात, मी वैकुंठात सांपडत नाहीं, योग्यांच्या हृदयांत आढळत नाहीं, तर माझे भक्त ज्या ज्या ठिकाणीं गातात त्या त्या ठिकाणीं नारदा, मी उभा असतो. तेथें नामघोषाचा गडगडाट आणि भगवंताचा जयजयकार गर्जत असतो असे समर्थ सांगतात
II दासबोध दशक १ - स्तवननाम
समास ८ - सभास्तवन II
॥श्रीराम॥
आतां वंदूं सकळ सभा | जये सभेसी मुक्ति
सुल्लभा | जेथें स्वयें जगदीश उभा | तिष्ठतु भरें ||१||
१] श्लोक || नाहं वसामि वैकुंठे योगिनां हृदये रवौ |
मद्भक्ता यत्र गायन्ति तत्र तिष्ठामि नारद ||१
नाहीं वैकुंठीचा ठाईं | नाहीं योगियांचा हृदईं |
माझे भक्त गाती ठाईं ठाईं | तेथें मी तिष्ठतु नारदा ||२||
याकारणें सभा श्रेष्ठ | भक्त गाती तें वैकुंठ |
नामघोषें घडघडाट | जयजयकारें गर्जती ||३||
प्रेमळ भक्तांचीं गायनें | भगवत्कथा हरिकीर्तनें |
वेदव्याख्यान पुराणश्रवणें | जेथें निरंतर ||४||
परमेश्वराचे गुणानुवाद | नाना निरूपणाचे संवाद |
अध्यात्मविद्या भेदाभेद | मथन जेथें ||५||
नाना समाधानें तृप्ती | नाना आशंकानिवृत्ती |
चित्तीं बैसे ध्यानमूर्ति | वाग्विलासें ||६||
भक्त प्रेमळ भाविक | सभ्य सखोल सात्विक |
रम्य रसाळ गायक | निष्ठावंत ||७||
कर्मसीळ आचारसीळ | दानसीळ धर्मसीळ |
सुचिष्मंत पुण्यसीळ | अंतरशुद्ध कृपाळु ||८||
योगी वीतरागी उदास | नेमक निग्रह तापस |
विरक्त निस्पृह बहुवस | आरण्यवासी ||९||
दंडधारी जटाधारी | नाथपंथी मुद्राधारी |
येक बाळब्रह्मचारी | योगेश्वर ||१०||
पुरश्चरणी आणी तपस्वी | तीर्थवासी आणी मनस्वी |
महायोगी आणी जनस्वी | जनासारिखे ||११||
सिद्ध साधु आणी साधक | मंत्रयंत्रशोधक |
येकनिष्ठ उपासक | गुणग्राही ||१२||
संत सज्जन विद्वज्जन | वेदज्ञ शास्त्रज्ञ माहाजन |
प्रबुद्ध सर्वज्ञ समाधान | विमळकर्ते ||१३||
योगी वित्पन्न ऋषेश्वर | धूर्त तार्किक कवेश्वर |
मनोजयाचे मुनेश्वर | आणी दिग्वल्की ||१४||
ब्रह्मज्ञानी आत्मज्ञानी | तत्वज्ञानी पिंडज्ञानी |
योगाभ्यासी योगज्ञानी | उदासीन ||१५||
पंडित आणी पुराणिक | विद्वांस आणी
वैदिक | भट आणी पाठक | येजुर्वेदी ||१६||
माहाभले माहाश्रोत्री | याज्ञिक आणी आग्नहोत्री |
वैद्य आणी पंचाक्षरी | परोपकारकर्ते ||१७||
भूत भविष्य वर्तमान | जयांस त्रिकाळाचें
ज्ञान | बहुश्रुत निराभिमान | निरापेक्षी ||१८||
शांति क्ष्मा दयासीळ | पवित्र आणी सत्वसीळ |
अंतरशुद्ध ज्ञानसीळ | ईश्वरी पुरुष ||१९||
ऐसे जे कां सभानायेक | जेथें नित्यानित्यविवेक |
त्यांचा महिमा अलोलिक | काय म्हणोनि वर्णावा ||२०||
जेथें श्रवणाचा उपाये | आणी परमार्थसमुदाये |
तेथें जनासी तरणोपाये | सहजचि होये ||२१||
उत्तम गुणाची मंडळी | सत्वधीर सत्वागळी |
नित्य सुखाची नव्हाळी | जेथें वसे ||२२||
विद्यापात्रें कळापात्रें | विशेष गुणांची सत्पात्रें |
भगवंताचीं प्रीतिपात्रें | मिळालीं जेथें ||२३||
प्रवृत्ती आणी निवृत्ती | प्रपंची आणी परमार्थी |
गृहस्थाश्रमी वानप्रहस्ती | संन्यासादिक ||२४||
वृद्ध तरुण आणी बाळ | पुरुष स्त्रियादिक सकळ |
अखंड ध्याती तमाळनीळ | अंतर्यामीं ||२५||
ऐसे परमेश्वराचे जन | त्यांसी माझें अभिवंदन |
जयांचेनि समाधान | अकस्मात बाणें ||२६||
ऐंसिये सभेचा गजर | तेथें माझा नमस्कार |
जेथें नित्य निरंतर | कीर्तन भगवंताचें ||२७||
जेथे भगवंताच्या मूर्ती | तेथे पाविजे उत्तम गती |
ऐसा निश्चय बहुतां ग्रंथीं | महंत बोलिले ||२८||
कल्लौ कीर्तन वरिष्ठ | जेथें होय ते सभा श्रेष्ठ |
कथाश्रवणें नाना नष्ट | संदेह मावळती ||२९||
इति श्रीदासबोधे गुरुशिष्यसंवादे
सभास्तवननाम समास आठवा || १.८ ||
No comments:
Post a Comment